اللى يتكسر يتصلح

اللي بينكسر بيتصلح دايما يقولولنا كده بس اللي شايفاة ان اللي بينكسر عمره ما بيتصلح ولو اتصلح مش هيرجع زي الاول ولو رجع بردو هيفضل اثر من اللي حصله

امال كانوا بيضحكوا علينا لما يقولوا اللي بينكسر بيتصلح ده بالنسبة للحاجات المادية لكن في حاجات مش بنعرف انها انكسرت لكن بنحس اننا مخنوقين اوي نحس بحرارة عالية في جسمنا نحس بصداع شديد الم في المخ تفكير في ايه متعرفش بس تحس انك مش مرتاح في حاجة اتكسرت جواك او انت كسرتها فين متعرفش ليه ازاي امتى؟ مش عارفة

في حاجة غلط

تبدا تراجع نفسك انت عملت ايه وايه اللي جرالك وليه ده حصل وايه سر اللي انت حاسس بيه هتلاقي ايه

حاجة من اتنين

اما انت جرحت حد او حد جرحك اما انت كسرت حد او انت انكسرت

بيبقى جواك الم كبير في الحالتين ويمكن لما تكون انت اللي جرحت بيبقى الالم اكبر مفيش اكبر من الاحساس بالذنب تانيب الضمير ده بيبقى دمار صراع كبير اوي

طيب واللي اتجرح؟

هل كل الجروح بتتداوى هل كل اللي بينكسر بيتصلح؟

ماعتقدش

لان مش كل الجروح مادية يمكن لو انت ماشي في الشارع ودخل في رجلك مسمار وانجرحت تبقى بسيطة لكن المسمار نفسه لو دخل في قلبك هيقتلك اكيد

في حاجات ماتنفعش ترجع زي الاول الوفاء الحب الغدر الخيانة الذل الاهانة الصدق الكذب الكراهية الحقد الغل الحسد النفاق حاجات مش بنشوفها بعيوننا لكن اثارها كبيرة ممكن تحييك وممكن تقتلك

هل الاعتذار بيداوي الجروح دي؟

حتى لو داواها حتى لو المجروح عدا الازمة هيفضل الاثر موجود هيفضل علامة من الجرح موجودة حتى لو سامح حتى لو حاول ينسى مش هترجع المية لمجاريها

طيب واللي بيجرح بعد ما بيعتذر بيحس انه كده عمل اللي عليه وخلاص؟

ماعتقدش الا اذا كان بلا ضمير لازم يفضل اثر جواه يفكره كل شوية بالجريمة اللي ارتكبها

جرح ورا جرح ورا جرح

الحياة مليانة جروح فيها اللي بيتداوي وفيها اللي بيقتل

كلمة تحييك وكلمة تقتلك

علشان ما اصدعكمش هاختصر اسئلتي

1- ايه رايك في عبارة اللي بينكسر يتصلح؟

2- عمرك جرحت حد او انجرحت من حد وحسيت بايه في الحالتين.؟

3- هل الاعتذار بيداوي الجراح؟

4-ايه الطريقة اللي تتغلب فيها على جراحك؟

» مين فينا اللى اتغير (الزمن --- ولا نحن البشر )؟!!
» أختار وظيفه للعضو اللى بعدك وهو ونصيبه ههههههه